Асьмеос асьмемыз, яке шунды шоры вылӥе

Котькуд пасьын: «асьмеос асьмемыз», «удмурт удмуртэз», «зӥбиськом, выйтӥськом, вииськом». Копак удмурт ананизмлы укша.

Зэмзэ ке, кулытӥськиськом, ляб палъёсмес пушйытӥськом, собере обиден тырмем сюлэмъёсмес кыре поттытэк, шыпытак ошиськыса улонысь кошкиськом.

Тӥяса пыд поттэм потэ та выжыяськем кыйгу сямъёсты. Ас калыклэн уката но усто сямъёсыз сярысь вераськем но потэ, данъям но потэ но ӝутэм но потэ соосты — вылӥе, шунды шоры.

Нош лекос тодметэз синйылтыку но мылкыдын критика вордӥськыку, тупатэм ке потэ, лулчеберет сярысь ас пуш малпанъёсын эшъёсын-огиньёсын люкиськем ке потэ — сое ватэм уг поты но уг луы. Со ведь туала тазалыко дунъет, кусыпмес возён-вераськон, озьы ик усьтӥськон — астэ ас калыкедлы усьтон. Удмурт дуннеозь кыдёкысен вазиськиськем кадь: «Мынам но виртӥм удмурт вир ортче, мынам но йырсазьы удмурт!» яке огшоры «Мон но удмурт!» Уг пот улэм палэнскыса но ныр улэ серекъяса, чиньыен возьматъяса но пуштырмыса возьдаськыса.

Луысал ке ӟигары но йырвизьы, куштысал ни сюлмысьтым удмурт пушме, тӥясал ни сямъёсме, дугдысал ни гожъяны но вераны ас шонерме но улон дуннез валанъёсыным ӧръяськемме, ворсаськысал ни шудо но майбыр Мускоям но зыммысал. Зыммысал удмуртэтэк, куасьмысал, кулысал, дыр. Мон уг малпаськы, уродэз сярысь акылес зубыльтӥсько шуыса. Пуштӥсько ке — потэ ни кырсез, зэмзэ но зыммем бус шӧдӥське. Ӵемгес абдрам но шумпотон мылкыдъёсме кисьтӥсько кадь вотэсэ. Шыпыт улыны быгатымтэ — со алама ӧвӧл, дыр, кадь потэ мыным, мылкыддэ но малпандэ шараян — со сыӵе шаплы шаян Алнаш сям нерге.

Гань-гань ваньмыныз соглаш луон — со астэ вузан арбери кадь, укша уйёсы выем Обломовлы, яке улонтӥ шыпыт вамышъясь вужерлы , яке отчы-татчы ӵыжам гуньдэм муртлы.

Брангурт песянайёс воштӥсько тусбуйя, удмурт кыл дышетонэз уг куто, одӥг кылем факультет ворсаське.

«Асьмемыз асьмемыз» гажан сярысь вӧлмытӥськоно, пальккиськоно, алятӥськоно шуыса соглаш. Озьы ик соглаш, пуныос кадь утыса улоно ӧвӧл шуыса ог-огмы шоры.

Равнодушной уг яра луыны. Диалог медло. Соку тазалык но кылдоз, вотэсмы но пушъёз, улонмы но азинтиськоз. Инмарен валче.

Шаплыяк Удмурт гужем сярысь

Удмурт гужеме кутскиз Лад-лад «Супер гужемысен». Ваня Белослудцев синмаськытӥз — тусбуез укыр гольтрес чебер. Амисовотъёсты келямы лэся олокытчы.

Ӵуказеяз Лудорвай музъем вылын кема возьмам Гербер но Уин шулдыръяськон ортчиз. Татын берпуметӥзэ кырӟазы Малпанысь апокъёс: кинэ кытчы, пе, куштэ улонзы. Калыкез синмаськытӥзы Щепкин нимо вылӥ дышетсконниысь пияшъёс но нылашъёс. Котыр эшъёс но бӧлякъёс, тодмоос но туганъёс. Мылкыд вылӥ лобась душеслэн кадь вал: лӧптэмын, яратонэн кудӟемын.

Гудырикошконэ нош шумпотыса ветлӥ та шунтэм интые: тӧлвуколы 100 ар тырмиз.

БВИ клубын кылзӥ Silent Woo Goore-лэсь нырысетӥ потэм альбомзэ. Куд-ог кырӟанъёссэ рос-прос тодӥсько ини ке но, туж лыктэме потыса лыктӥ гуртысьтым, 7 долларен дисксэс но басьтӥ ай.

Перепечкинэ но пырай, перепеч веръяй. Нокин ке но о:й вал — уксёме шумпотыса келяй: асьмелы ик берыкти:ськоз ай шуыса.

«Пузкар» кино снимать каремез адӟытэк кошкеме ӧз поты, одно ик лыктоно кариськи. Ачиз Палган эшлы дэмланъёсме верай!

Алнаш музъемез туж яратӥллям ини шӧдске Электроникъёс но Эктоника. Юри адӟиськыны шуыса нош лыктӥ, кизилиос ке но — туж яратоно кадесь.

Нош самой но вунонтэмез — со гурт! Турнаськон но картопка октон дырез фитнес малпай, уриськыку — солярий луоз кожай. Нош жадьыса тушак вылэ пограно вал ӝытъёсы. Кӧй но вӧй вылын узыр ортчем та гужеме. Адямиос «Чебертӥськемед» шуизы, нош мон шумпотылӥ! Берло ини тодӥ, тазамемме озьы верало вылэм.

Мар бен, тужгес но шулдырез та гужеме: Удмурт шаерын, пичи дырам воксё выем кадь ортчиз.

Нош ик тани бадӟым сюрес вылэ потӥсько. Капчияк гынэ уг мыны ни ай малпай, картопка но понӥ, кешер, горд кушман но. Мар-о юнме шат быдэс гужем ури но ву кисьтай? Мускоын али малпаса-малпаса сиё!

Малпало ай туж йӧнтэм Емельянов Олёшез но, востэм Шкляев Олёшез но, мон кадь удмурт шаерлэсь мӧзмись Пронин эшез но, ӟурись ке но, корт кадь визьмо Паша Поздеевез но, шузи кадь серекъятӥсь Бикузинэз но, Эркишевен Загребинъёслэн мон понна шулдыресь кырӟанъёссэс но, мынчык копейка кадесь нылъёсыз но, кельше мыным Зангарикен яке Лади Светӥен пыш-пыш вераськыны, сюлэм шугъяськонъёсыз серттыны-пертчыны, Даралиен оломар дауртыны, со вӧзын ачим но воштӥськисько мон.

Я! Сюрес вылэ потоно, Муско возьма!

ПыСы: Озьы ке но — берпумъян одӥг — удмурт карт нош ик ӧй шедьты та Удмурт шулдыр гужеме.

Песяйёс

Мускойысь песяйёсты туннэ чакласа улӥ.

Одӥгез:

Кизер пурысьтам йырсиез «култышкаен» бинямын. Пельпумаз чилеп-чатыр кышет куштэмын. Пыдаз «балеткиос». Дэремез «трапециен», мугорзэ туж благородно возьматэ. Горд буям гижыосыз кузесь, шонерак киосыз ог-огзы вылэ тыремын.

Кыкетӥез:

Тӧдьы вакчи йырсиосыз туж йӧно «укладкаен». Туфлиосыз «танкеточкаен». Тӧдь-тӧдь дӥськутэн. Очкиосыз зарни буёло оправаослэсь. Вераськон манеръёсыз туж деликатноесь, уката йӧно адске.

Куинетӥез:

Трость борды возиське. Пуке сак кылзӥськыса эшъёссэ. Пыдъёсыз балериналэн кадь тыремын нырысетӥ «позициен». Сумкаезлэн куэз воксё но вужмемын, но адске — улонэз адӟемын, туж стильной.

Кыӵе соос мукетэсь, асьме песяйёсын ӵошатыса! Тодам ваи фольклор бичан дыръёсме, курсовой кино лэсьтэмъёсме, ӵужайме но анайме (озьы шуиськом вал прабабушкамес). Удмурт дэремъёсын-айшетъёсын-кышетъёсын, ваньмыз ватэмын. Кисыриосын но вӧё-вӧё небыт киосын. Соосты кылзӥськыса нокыӵе туала психологъёс кулэ ӧвӧл. Гань-гань огшоры валэкто вал мыным: «Осто, трос малпаськиськод, йырдэ каньылак кар, улонэд палэнтӥ ортчоз» яке «Трос эн серекъя, синкыли кылдоз». Мудронэсь, яратымонэсь, вешаськисесь, огшорыесь — быдэсак асьмелэнэсь. Кошкемын ини тросэз — жалесь но мӧзмытӥсесь…

30 ар та дуннетӥ

30 ар тырмиз. Кема дасяськиськи, сюлмаськи, пересьмон калэ вуэмме шӧдыса.

Нош туннэ вазь ӵукна шундылы йыбырттыса шӧдӥ эрико омырын пыласькемме, сяськаё пушйемме, мылкыд лӧптэмме но капчи бурдъёсме — соос лопыръяськемын, тыбырме лэчыт нуо азине! Нылмуртлэн вуиз самой шудо вакытэз! Визьмаськемын, чебертӥськемын, быгыльскемын, шузи вакыт берлане кемдэмын!

Йылпумъянъёс сярысь ке — соос байлыко, Инмар трос сётӥз 30 ар куспын. Кытчы но ӧӥ вуы, мае но ӧй адӟы, кытын гынэ но ӧй дышетскы, мар гинэ ӧй быгаты, кыӵе гынэ пумиськонъёс ӧӥ вал!

Самой дуноез — улонэ нуэ монэ паймымон адямиосын валче. Кудмында мон туннэ басьтӥ гожтэтъёс-жингыртонъёс, пелез пӧсятӥсь кылъёс — сюлэмме ӟырдатӥсь сяськаос! Та понна улэм потэ. Жадён но майбыр мылкыд, писэйлэн сэндра вылын кыллемезлы укша. Укыр умой. Тау эшъёс!

Таин валче улӟытӥсько куалалулыме, яратонэн пальккиське лулы-пушкы.

Ачиз улон сайка кадь. Лобасько вылэтӥ.

Льӧль очки пыр яке зэмос удмурт лулчеберетлэн тубаттӥ ӝутсконэз?

Куалялюльые пушкам шумпотэ удмурт иворъёсты лыдӟыса. Весь кожало, мон льӧль очки пыр адӟисько кыдёкысен удмурт югдурез. Нош мар кырсез, мар аламаез туала зарни пичи асьмелэн «коркаямы»? Асьтэос чаклалэ али монэн ӵош оглом кылдэм югдурез, ӵошатэ сое 10 ар талэсь азьло шаерамы суредэн. Валалоды вылды яркыт буёлъёсын выльысь вордӥськем яратоно музъеммес.

Кутском:

Брангуртысь песянайёслы ини дышим — озьы ик луыны кулэ вылэм!

Огазе Палэзян но Элькуновидение — одӥг-кык шуон куспын кадь лэсьтӥське!

24 час куспын нош но нош чузъяське радио пыр удмурт кырӟан: татын Италмас вашкала крезьгуръёс но туала Уллапала пияш Богданов (тырмытыны луэ вылэм асьме гуръёсын но со кузьда эфирез)!

Пумтэм-йылтэм эктон-шудонъёс Ижкарлэн тодмо клубъёсаз (шыпыт малпанъёсам вал меда сыӵеез азьло вакытэ — Редукторын сяна одӥг пол ӝыны арлы шулдыръяськон)!

Уксё тӥрлык, айшетъёс, пужыос модае пото!

Даралиез но Амисо вотъёсты цитировать каро ини!

Карысь пурысь борддоръёсты чебертэ Бикузинлэн лулчеберетэз!

Палганлэн киноез сярысь уг вера асьтэмез гынэ!

Камали ӝоген кыдатоз пичи нылпиосты!

Пыжем табаньёс кадь вуозы Щепкин нимо училищеысь йӧно егитъёс-усточиос!

Камасутра берыктэмын!

Чебер нылыкышноосмы — Едыгарова но Пчеловодова кадьёс — кунгож сьӧрын валто удмурт научной ужъёсын!

Мускоын поръёс но коми калык керӟегъяське: Тӥляд, удмуртъёслэн — «движуха», пе, нош милям — «тишь да гладь»!

Удмурт кылэз вӧлмыто ини немец кылын!

Ильин эш кадьёс лэсьто выль адӟытон!

SWG шараятэ крезьгурмес Голландия но Италия музъем вылын!

Герд пуксиз, Трокай султӥз атыкай музъем выламы!

Кунгож сьӧрысь удмурт меценатъёс сайкало!

Удмурт кылэз дышетыны кутско Ижкарын но Уваын гинэ ӧвӧл — Кузон но Муско каръёсын — адями трос, ваньзэсты пуктыны но инты шуген сюре!

Юмшан но Чичпотон, Удмуртлык но Удмурт сямен, Чеберай но Италмас, Лудорвай но Кызьпу арама, синмаськымон тузӥ кизилиос но яркыт дӥсь вурисьёс, выль театр но выль калык куспо корка, газетъёс но журналъёс, Кык Олёшъёс но трос кузя Светӥос, Поздеев но Шкляев, Кенеш но Дэмен!

Та лыдпус пӧрме ӟечлыклы но яланбудӥсь пайдалыклы! Оскыны курисько чеберлыкмылэн пушъемезлы, яратоно удмурт лыдӟись эше! Емышъёсты веръяны уката но ческыт вылэм, дасезлы шумпотоно вылэм, кылдэмезлы льӧль очки пыр гынэ учконо шат вылэм? Кин дӥсьтоз даллашыны монэн та удмурт лулчеберетлэн тубаттӥ ӝутсконэз ӧвӧл шуыса? Азьлань гынэ, коркаез ӝутоно, тубаттӥ тубоно!

2012-2015 © Copyright Kualaluly