Суредъёс

Лыз инбамын тӧдьы пилемъёс-пилемпиос уяло. Чорыг пӧрме валлы, нош со сяськалы, собере ваньмыз оглом луыса сураське-воштӥське но выль суред кылдэ.

Нош шуре лэзьяськод ке табаньёс? Шунды сиос ворекъяло пӧртэм пужыосын: кырсь ву, али гынэ ӟазегъёс пыласькем инты син шорын воштӥське. Котырес-котырес ву суредъёс йырез поромытыны кутско.

Озьы ик шыпыт вераськыса тылскемен усто пукыны. Пеймыт дыре со мальдытэ, чильдэ, ворекъя. Туж пӧсь мадён ыстэ.

Бадӟым карын улон пӧзе. Нош та вакчияк суредъёс син азьын ке — сюлэм буйга. Сыӵе шыпыт но гань-гань. Вань мугорез яратон ӟыгыртэ.

28!

Азьланяз таӵе лыдпус кылдоз 28 ар ортчыса гинэ — со луоз 56 арес. 28 арес — адямилэн улоназ со огшоры лыдпус ӧвӧл. 28 арес йылпумъя нырысетӥ улон сюресэз.

Со кылдэмын ньыль сизьым ар люкетъёслэсь. Со йылпумъя квадрат циклэз. Со быдэсак нырысь улон поглянэз питыртӥз. Кутске вылез, чылкытэз но йылпумъяське вань улон шӧдонэз валан шӧм. Быгатонлыкъёслы инкуазен сётэм дыр ортчиз. Ӵуказеысен кулэ ини бодыяськыны аслам кужыме, визьмы, луонлыкъёсы вылэ. Кыкетӥ питыран бекмыльтӥськон куспын турттоно быдэстыны вань аслэсьтым осконъёсме.

Али улонам ортче бадӟым гож. Выль уж. Выль азинсконъёс. Выль осконэ мынам азьлань улонэлы.

Эшъёсы ӵемысь верало: бызёно ни, нылпи ваёно, семья кылдытоно. «Дугдэ, кино лэсьтоно» — шуисько сыӵе дыръя. Зэмзэ но, Инмар ыстӥз сыӵе луонлык. Брангуртысь песянайёс сярысь лэсьтоно бадӟым кино! Оскисько, со сярысь но гожтыны быгато на пыр-поч та бамам. Бӧрӟыто соос, серекто, улон сюрес сярысь малпаськыны косо. Толон тани, Авторадиоын эфир бере одӥгез дорам лыктӥз но, юн-юн ӟыгыртӥз. Дэра дӥськутсы бордысь шуныт потэ. Али ке но туж зол шӧдӥсько: озьы вешасько удмуртъёс гынэ, озьы веша вал монэ котькуд ӝыт анае, озьы чапкыса выллем веша вал ӵужае.

Та анаелэн но инбамын ини бадӟым шумпотонэз, 28 ар талэсь азьло, вордӥськон нуналам чын праздник вал солы. Пичи адями вордӥськем бере но нырысетӥ аръёссэ ӟечкылало ведь анаез но атаез! Соин ик соослы тау шуон кылъёс чузъясько та нуналэ! Лыдӟись адямие, жингырты али ик дуно адямиосыдлы, кин тонэ вордӥз, курисько тонэ! Со туж кулэ арбери.

Эшшо вераме потэ на бадӟым тау вань шуныт кыл верам кылъёс понна та 14-тӥ куартолэзь нуналэ. Мон понна со туж бадӟым азьлань улонэлы оскон!

Вормон нуналэ песятаелы сӥзьыса

Котькудӥз адями туннэ — 9 куартолэзе тодэ вае аслэсьтыз песятайзэ, песянайзэ. Ас понназ-а, шар-а со тау каре, данъяське, пыраклы сюлмаз мургес пыртэ самой бадӟым вормон нуналэз.

Ӵужатаелэн атаез Семон песятаймы Алнаш черко гуртын гажано адями вылэм. Со — нырысетӥ туспуктӥсь (фотограф), со — нырысетӥ йырсиӵышкись (парикмахер). 30-тӥ аръёсы ужын кулэ луись арбериослы ветлэ вылэм Муско каре. Одӥг пол кузпалзэ но басьтэм сьӧраз. Огай апай (анай шуиськом вал сое, прабабушкае луэ) шаплы адями, быдэс улонзэ фермаын ужамын, удмурт дӥсен нырысьсэ мынэм бадӟым каре. Пыриллям ГУМе: «Ветлӥсько, ветлӥсько, йырме шонаса, воксё абдраса бадӟым лавкатӥ. Олокытысь-марысь мон кадь ик кышномурт — воксё мынам кадь удмурт дэремен — шорам учке. Паймыса, дораз вамыштӥ, со но вамыштэ азям, пырак синмам учке…» Со вылэм синучкон.

Пинал но тузӥ нылмуртъёслы Семон агай химияен йырсизэс баблес лэсьтыны быгатэ вылэм. Партретэ но пуктыса лэзе вылэм.

41-тӥ арын ваньмыныз ӵош кошкем тушмонэн ожмаськыны, аныкай музъеммес утьыны. Та аре ик бырыны шӧдем Ленинград улын. Со ышем-бырем адями… Тарасов Семён.

Нош Огай — милям анаймы 4 нылпи будэтӥз. Семон картэз сярысь шыпыт куараен, куддыр гынэ вералля вал мӧзмыса.

Коркамы Алнашын табере буш. Со гынэ на тодэ йӧно но йыгмыт песятаймес — Семон агаймес.

Ӝоген Быдӟым нунал

10 ар гынэ гуртын улӥ. Но тодэ-ваёнъёс укыр яркытэсь, угось со вал сьӧлыктэм пичидыр!

Тулыс Акашка нуналэ потӥськом вазь ӵукна буям кукейёсын бускельысь бускеле. Одно ик выль дэремен, чылкыт лад-лад дӥсен. Шурсьӧр урам, Починка урам, Балтаче но кожыса вуиськом. Парен-куинен пыраськом коркась корка. Сыӵе но умой пумитало пичиосты, ми ведь выль шуд ваиськом котькуд дор пушкы. Туж шумпотымон, мылкыд поръяськемез али но юн зол быгатӥсько син азям пуктыны. Собере ини вамыштӥськом Луд пала. Татчы люкасько вань егитъёс гурезьысь кукей питыръяны.

Лудын интыяськемын кебит, со вӧзын валъёслэн гидзы, вӧзтӥз шур бызе. Тужгес но чеберез, ӝутӥсез, лушкемез: вить батыро беризьёс. Выж дорысь шор беризь улын ортчылӥзы тужгес но бадӟым вӧсяськонъёс. Соин но, дыр, котьку уксё синйылтыны луоз вал та веськрес, лабрес, ваё-ваё пуштрес писпу выжыысь. Пужъятэм ӵушконъёс вай бордын, вылазгес йыркобы. Милемлы пичиослы та выжыкыл дунне вал, дыр: татын ортчем шудонъёс но серекъянъёс уг вуно аръёс ортыса но. Кин дышетӥз, кин валэктӥз, но вань пичиос тодо вал: жиетыса черекъяны уг яра та вӧсяськон интыын, педло ветлыны но алама урод кылъёсын вераськыны пот кенер сьӧры. Соин но, дыр, туж утён-вордонэн пачылмо тодэ-ваёнъёсы.

Нуназе бере кутске вӧсьнерге. Таиз ини бадӟымъёслэн ужрадзы. Тодӥсько на одӥгзэ гынэ. Юмшало вал урамлэн улысеныз кутскыса. Озьы ик коркась корка мыно йылэ-вылэ, Инмар доры.

Ортчиз, дыр, ог 15-20 ар. Луд шыпыт улэ, беризьёс мӧзмыса кадь сыло, кебит пересьмем. Ортче, ваньмыз тӧлӟе. Гуртын ортчем пичидыр уйвӧтъёсы гынэ на вуэ.

Шып одӥгнам васькасько пичи сюрестӥ та выжыкыл дуннее. Ӟыгыртӥсько дуно беризьме, со мыным шумпотэ, пушкуазьысь выль кужым кузьма.

Вакчияк

Малы? Синмаськи но оски?
Кызьы? Яратӥ, шузими?
Мон чылкытме быдтӥ,
Сюлэм буйганме ыштӥ.
Лул шунытме кузьмай,
Пуш чеберме саптай,
Сьӧлыкъёсме ватсай,
Озьы ке но кырӟай!
Кырӟай тэльын, лудын,
Гуртын но юртъерын.
Буйганъёсме шедьтӥ,
Выль улонме яратӥ,
Визьмаськи но нош оски.

2012-2015 © Copyright Kualaluly