Ныл но Пи Мурт

Солэн ваньмыз кузь: йырсиез но, гижыез но, пыдъёсыз но. Солэн ваньмыз быглес ма луыны кулэ быглес. Со кескич мыня, ӧтьыса кадь – изъянтыса. Ваньмыз солэн чебер: тусбуйыз но, малпанъёсыз но, лулпушкыз но, дӥсез но. Со уг дугды, со выльысь но выльысь дугдылытэк ужа ас чеберлыкез бордын. Со йырвизьзэ но сына шонер малпанъёсын: «Ваньмыз умой луоз!». Со уг сёты урод кылъёслы чилектыны янгышен йыр пушказ. Со быгатэ ни ассэ чакланы но эскерыны. Со ини быдэсак дышиз ассэ яратыны.

Номыр уд кары: солы нокине яратыны. Чеберлыкез ванен солэн нокызьы уг лу быземез. Со малпаны одъя: пиосмуртъёс кулӥллям. Со ини дась нош но нош дышетскыны, ас сюлэмезлы выль ӧс усьтыны.

Тӥни таӵе со туала нылмурт. Соос луо тросгес, ваньзы чебересь но визьмоесь, одӥг кадь ваньзы бизьыны дасесь. Тае валаса но шӧдыса вазиськиз нырысь ик туала улон. Чеберайёсты потто заводын кадь: книгаос но передачаос, тренингъёс но пыдэстэм «зарни вотэс». Котькытын дышето но верало: кызьы пияшлы кельшоно, мар солы дасяно но мар дӥсяно, кытысь нырысь ик сое шедьтоно, кытӥ кыӵе зыраськоно, буяськоно, сынано, пертчоно, вандоно, пуктоно зэмос нылаш луон понна.

Мунёосты лякылон но бичан сямен ик вордӥсько та бадӟым конвейерын огкадь нылашъёс. Соослэсь йырзэс сурало-пожало: кыӵе луыны кулэ – лякыт но ненег-а, яке шаян но шаплы-а, кызьы зӥбоно воргоронэз ас ки улад но кызьы бызьытоно сое ас гижы пыдсад, сюан вуытозь медаз пегӟы шуыса? Сюлэмез бугыртӥсь нылюан: кыӵе мунё али дуногес но кулэгес?

Нокыӵе яратон уз ик гомӟы но уз пишты, зэмос воргорон синъёссэ гынэ маяллялоз та мунёез учкыса. Нокыӵе шумпотон но шуд уз вордӥськы. Ноку но. Малы ке шуоно, вань адӟонэз берыктиськемын ас палаз, пыӵамын визьмаз но кылаз: мон, мынам, мынэсьтым, монтэк. Со ноку уз шуы: мон уг валаськы, солэн ымысьтыз ӵемгес потоз: монэ адямиос уг валало. Воргоронлэсь возьма со шунытсэ, чеберзэ, визьзэ, байлыксэ. Ненегзэ но мед сётоз, урод кылын но интыяз мед вазёз, мед серекъятоз но, мед лӥятоз но. Одӥг кудоын пылесос но, телефон но, люстра но, холодильник но. Эшшо ик та изьвер мед быгатоз лобатыны тонэ уйвотъёсад.

Нош туала пиосмурт зӥбиськемын, кышкамын, сюрес дуре урдӥськемын. Со но возьма аслэсьтыз шудзэ, шундызэ, шыкысысь шуныт шумпотӥсьсэ. Но мылкыд веранзэ со мур ватэ, шара малпанъёссэ гулбече ыстэ, йырзэ улэ ошыса, шыпыт мынэ воргорон дуннетӥ. Ӟенеликлы куке улонзэ сётэ, ӵемгес туала улонын со ас кадь пиосмуртлы сётиське но сое яратэ, яке эшшо но урод: ошиськон калэ ассэ вуттэ.

Сюресъёс нимаз кошко. Нош но нош кышномуртъёс огназы будэто нуныоссэс. Атай кылэз тодытэк, атай куараез кылытэк будо пичи нылпиос…

Пиосмурт вордӥськемын кузпалзэ шедьтыны, нылкышно аслэсьтыз воргоронзэ, ӵош соос кылдыто нуны – азьлань улонлы пытьы. Та Изкар кылдэмын ни вашкала кемалась дыръёсы-дауръёсы. Инкуазен вамышъяно артэ – Инмарен кузьмам пуштросэз номырин но уд алда. Луламы тылсин понэмын, йырвизьмамы пыӵамын дӥсьтон, сюлэмамы – пушчебер пиштэ. Тае ваньзэ шедьтон понна – выжы шоры берытсконо. Пыд вылад йыг-йыг султыса– липетэд но вольыт пуксёз. Адями улӟе аслаз пичи лулбичетаз.

Воргорон-пиосмуртъёс! Тросэзлы валантэмгес праздник нуналэ – сӥзисько шедьтыны шыкысысь шуддэс. Дыртэ со доры, бизе но дӥсьтэ!

Нош ӝоген вуоз асьмелэн но нылужрад – 8 март. Оло тодамы ваём нылкышно шыпытгес сямъёсты? Капчигес луом, йырмес туж вылэ ӝутытэк тыршом оскиськыны возьмась-утись воргоронъёсмылы? Ӧйтод… Кытын меда потон пась вань та выль чебер улон мадёнын?

«Пограничный эффект». Нырысетӥ возьматон

«Пограничный эффект» киномылэн туннэ предпремьерной возьматонэз! Кутсконысеныз пумозяз валтӥ мон та картинаез нуныез выллем. Сюлэм нош тэтча, Домжурын быдэс зал тырмемын. Геройёс но татын, съёмочной группаысь тыршисьёс но, адӟись-учкисьёс но, журналистъёс но. Пафос шуон амал ӧжыт. Омыр туж каньыл, калык люкаськемын визьмо но валась. Нырысьсэ бадӟым экран вылын киноез возьматон – зэмзэ но туж бадӟым кылкутон.

Тыл кысэ кинотеатрын – кутске киномы. Мон ини котькуд кадрез тодӥсько тупен-тупен, рос-прос, умой-умой. Нош нырысьсэ кадь аслым усьтӥсько киноез бадӟым экран вылын. Интыен калык шыпыт улэ, интыен быдэс куараен серекъя, нош куддыр бӧрдэм куараос кылӥсько пельпумам. Адямиез уд алда, со ачиз пуктэ акцентъёс, со ачиз ини валтэ тумошо валан-мылкыд сямыныз, лулшӧдонзэ кыдёке ватытэк – шарая аслэсьтыз учкон дуннезэ. Со ик вань эмоция но восприятие. Со ик вань самой дуноез та ужрадын – учкисьлэн синъёсыз, пельёсыз, мылкыдыз.

Тодэ лыкто вань шуг-секытъёс но шумпотонъёс, сюлмын огыр-бугыр данъяськон кылдэ лэсьтэм уж понна. Син азе нырысь ик вуо экспедициысь учыръёс: Абхазиысь зарезь, ӵукна йогае ветлэм занятиос, чебер водительмы Омар (йырме бугыртӥз))), выжыкылысь кадь ик инкуазь но трос министерствоысь кабинетъёс; Украинаысь пограничникъёс но граница вискын куашетон-керетон-ченгешонъёс; Эстониысь рос-прос каньылак гынэ лэсьтэм ужъёс но востэм Служба безопасностиысь ужасьёс.

Мылкыд бурдъяськемын. Выль проектъёс возьмало, отын выльысь оскон выжыятоно, соосты выль кен выллем нош пияно, улон кузьмано, удыс пушъет будэтоно.

МУСКО ӜЫТЪЁС

Уж дорысьтым укное потэ ӵапак П.И. Чайковский шоры – консерватория азьысь синпелет. Быдэс нунал ӵоже со монэ синйылтыса кадь пуке. Оло шӧдэ ас музъем вылысьтыз нылашез та быдэс дуннелы тодмо крезьгурчи. Уллане урамтӥ бертыкум – ӝутӥське Красная площадь. Собере Манеж дортӥ кожыса, Ленин нимо библиотека возтӥ мыныса, Храм Христа спасителя пала кожон дорын ини троллейбусной остановка. Азям Мусколэн самой шор интыез – Кремль. Тур-пар кошко сьӧд машинаос – министръёсын но депутатъёсын, президентэн но премьер-министрен. Собере троллейбусын ортчисько Муско шур вылтӥ Бадӟым но Пичи Из выжъёсты, али укыргес но тодмо инты Болотной площадь кыле урдэсэ. Якиманкае васькыса мынӥсько ини фитнес-клубам: занятиос бере тужгес но яратӥсько уяны бассейнын но пукыны мунчоын. Выль улӟем мугорын дыртытэк бертӥсько дорам. Бадӟым урамтӥ мыныку, ӝутиське Гагаринлы сӥзем туж ӝужыт синпелет. Отчы вуытэк, Нескучной сад вӧзын интыяськемын улон коркае. Ӵапак кыдёкын ик овол – та садын лэсьто «Что, где, когда?» передачаез. Нош дорам ини пырыса балконысь чебер суред адӟиське: МГУ но Российская Академия наук. Котькуд ӝытэ ӝуатско соос вадьсын яркыт салютъёс.

Выльысь но выльысь синмаськисько Мусколэн тылсиосызлы, осконэ уг сия: тон усьтӥд бере ӧсъёстэ мыным – ӟыгыртытэк уд ни лэзь бурд улысьтыд, эркиялод, визьнод сётод, вешаса сямен кузь тубаттӥд азьлане ӝутод.

ЗОЛОТОЙ ОРЁЛ-2011

Зарни Ӧрӟи туннэ поръя Мосфильм омырын – кинематограф удысын одӥг туннэ вераськон – Зарни Ӧрӟи! Копак бриллиантъёс чилекъяло, котыр кизилиос лёгасько, вспышкаос-журналистъёс синэз мальдыто. Ми, котьку сямен выль киноенымы татын – съёмочной группаен та ӝук пушкын пӧзиськом. Мынам синъёс пезьдэмын выжлэн гулбечаз. Нокыӵе кадре сюрытэк йыртэм-пыдтэм татысь ышоно вал – возьыт неномыр но – асме зӥбыны дась туж кыдёке пыдло – штань пушкы. Пегаса-пегаса ветлӥ, ярам, пыри ини нырысетӥ павильонэ. Татын ини куинетӥ арзэ – угось котькуд ар мынам кузёелэн – Сергей Мирошниченколэн лэсьтэм киноез номинацие сюре. Та инты туж тодмо кинематограф улонын. Татын вордӥськизы Сергей Бондарчуклэн «Война и мир» (Наташа Ростовалэн балэз), Андрей Тарковскийлэн, Василий Шукшинлэн, Никита Михалковлэн шедевръёссы но трос мукет. Татын омыр шока быдӟым малпанъёсын.

Но чилектэм кадь нош васькисько зэмос улонэ. Тани 30-40 фотопуктӥсь адями – уралтэмъёс кадь, кутъёс кадь ошиськемын Андрей Звягинцев, Фёдор Бондарчук вылэ. Быдэс корридоръя вань калыклэн ымдуръёсаз лякемын шумпотон – туннэ туж бадӟым кинопремия! Нош кытчы мыным пырон пась шедьтоно та йырпоромись тусовкаын? Кызьы но озьы шокпуль луыса вуи аслам интыям – ярам, пукси, шокчи.

Кутскиз кадь фестиваль шуонзы. Камераос лобало йыр вадьсын, куинь часлы мон ини быгатӥ пушкам омыр басьтыны. Но номинация «Лучший неигровой фильм» ялэм бере – тужгес но зол тэтчаз сюлэм. Мукетсэ ивортӥзы киноез – актёр Михаил Ульянов сярысь трос веразы но солы сӥзем кинолы ик премия сётӥзы. Куинь Зарни Душесъёс вӧзы ӧм но дасялэ вал кадь инты студиямы, соин та аре палэнтӥ лобӟиз ӧрӟимы. Ярам, ивортэм бере шокчим кадь, тужгес но сюлэм тэтчан дыр ортчиз – шаплы гынэ вань мукет ужасьёслы смс лэзим выль иворен. Табере гань-гань пуки ини. Бырем бере нош мыняса васьконо тубатъёстӥ но, нош астэ быдэсак чаклано. Нош вуим Мосфильмысь лабиринт кадь коридоре. Татын самой тумошоез кутске! Ваньмыз донгаськыса сямен мыно банкет шуон 4-ти павильонэ. Мынам сайкало удмурт возьдаськон сямъёсы. Мар со? Кызьы сое вормоно ас пушкисьтыд? Нокызьы но номырин но. Чебер дэреме но чебер кадь уг поты ни, аслэсьтым мусоме но шӧдэмысь дугдӥ ни…

Мон юромо кыли группамылэсь. Каллен васькыса мынӥ гардероб пала но пегӟи! Потыса ӧй вуы Мосфильмысь – жингыртэ пелепонэ: кытын тон, малы кельтиӥд режиссёрез но малы ышид? Ымам ву басьтэм кадь луи но вазӥ «Возьдаськи» — пальккиськиз ымисьтым одӥг кыл. Собере коридоръёсысь мӧзмытӥськыса кутски зар-зар бӧрдыны: ведь кызьы куштод озьы мастердэ но гажано-яратоно адямидэ, кудӥз тыныд сюрес сётэ? Предательстволы укша кадь вамыше. Нош мукет ласянь керӟегъяськонъёс вордӥсько ини сюрес вылын: кытчы ватод та удмурт сямдэ, мар таин карод улон-вылонад, кытчы пырод та малпанъёсыныд но мылкыдъёсыныд? Синкылиосы васько, номыр кареме уг лу, вормеме уг лу пуш улонме.

2012-2015 © Copyright Kualaluly